Ngelekanio sya kukilya kulewa kuma nthi syi kivathukanio sya STRiDE
Andu matuaa na uwau wa kulwa na asuvii moo nimaleawa na kutengwa nthini wa ianda mbingi sya thayu. Nitueleetye maundu aa mesila na maundu mathuku kumana namo nthini wa kianda kivitu.
Kieleelo kitu kinene ni kuseuvya vandu vala andu mena uwau wa kulwa na asuvii moo matonya kutua thayu museo mbee kwa nzia ya maana na ya kusuviwa. Uu ni vamwe na kumina kulewa. Vate uu, kulewa kumanaa na kithio na miikiio ya ndua ila itonya kwithiwa na mii miliku na kwithiwa ya ivinda iasa. Kwoondu wa uu, ona kuthukuma kwa vamwe, kuvinduka kwa muthemba uu kwa ndua kukuaa ivinda.
Kwa kitumi kii, ve vata wa kunenga andu ala matuaa na uwau wa kulwa na asuvii moo vinya, vamwe na kumatetheesya kukomana na kulewa na kutengwa kwa nzia ya maana na ite muisyo. Nitukwitikila kana undu uu nutonya kwikwa kwa nzia syi kivathukanio. Nituunengane ngelekanio mbuthu kuma kwa andu matuaa na uwau wa kulwa na asuvii moo iulu wa undu mo makilitye kulewa na kutengwa nthini wa mathayu moo.
Kwa mundu kwitikila kana ena uwau wa kulwa ni mutalatala wi vinya. Ve kulewa. Undu ngwenda ni kana andu maikangue kivathukanio. Muikaneene iulu wakwa tandevo. Andu nimatonya kuneena iulu waku indi andu maku ma nyumba na anyanyau nimekuelewa. Nisindaa thina uu kwa kwitikila kumanyika kwa uwau wakwa. Kwitikila kana nina uwau wa kulwa. Andu ma nyumba yakwa ma vakuvi na anyanyawa nimekuelewa na uu nundethasya muno. Utethyo uu mbee ndyaawitikilaa. Ninang'ang'anie. Itina nambiia kukilya na kuthukuma. Undu waile kwika ni kwitikila, na kwika undu utonya kila muthenya. Kwitikila ni undu munene wa kusinda kulewa. Nambiie kutavya andu kana uu niw'o thina wakwa. uu niw'o vailye, na vai kuvinduka. Kutavya andu kana aa nimo maundu ngwisila. Ila nakosa, ndekea. Ethwa waisye nuuka kungethya kana kukomana nakwa vandu vana, ndilikanye. Mundu ndaile kuthata andu mamulilikanya. Ninathataa lakini yu ninaekie. Ikala nthi, uvange na kwasya,' Uni niika uu.'Iyiandikie maelesyo. Ninithaukaa mathau aa, ta mathau ma kumantha ndeto, ndyikaa nesa mathauni aa, indi naendeea na kumathauka, nithiaa kana nimandethasya kulilikana syindu. Uu niw'o vailye kwakwa.
Nina ivinda ya kwikala na muka wakwa. Tuyonaa kulewa ta undu muthuku twonaa ni undu wa kukilya na itambya yingi ya thayu.
Ingi, uvoo nutonya kunenganwe nthini wa masukulu ivinda ya maumbano ma asyai sukulu. Ii ni nzia nzeo ya kuvikia andu aingi kwa ivinda yimwe na kumavundisya. Uvoo ingi nutonya kunenganwe makanisani, nikana kuikiithya kana niwatamba kundu kwonthe nthini wa ndua.
Ii, ninaile kumatetheesya [asuvii ma andu mena uwau wa kulwa] kwa kumanenga vinya kuma kwa maundu ala nimanyiitye kuma kwa inya wakwa. Neeka uu, nimekuthuthya kuvingua ngoo syoo.
Uvoo nutonya kunenganwe kwisila mauneeni ma ndua
…Andu nimaile kwendwa, nimaile kusuviwa na niwaile kumethukiisya. Undu wisi, niwaile kumanenga mwanya wa kwithiwa undu mekwenda kwithiwa…. kwoou niwaile kwithiwa na umiisyo namo na kumaelewa na kumethukiisya.
Mbeeni nitwaemaa kui kundu kwa kukomana na andu na kuema kutwaa inya wakwa nza, ta kui sokoni kana kundu kungi, indi twamanya kana ithye ene nitwamuumiasya na kusangia kulewa kwake kwa kumuvitha na kuema kuweta uwau wake kana ena uwau wa kulwa. Yakuie ivinda kiasi kuvindua masuanio maitu iulu wa undu uu w'onthe. Yu nitumutwaa nyumba sya andu ma nyumba yitu, kundu kwa kukomana na kutavya andu uwau wa kulwa ni kyau, kana ni uwau wa akili na wi ndalili mbingi. Nitwithiawa na kusakua ila tuumutwaa nyumba sya andu angi, nundu ve andu aingi mataeleawa inya wakwa eika undu ukwika niki, kana makalea kuelewa uwau wa kulwa, kana makethiwa na mosuanio moo iulu wa uwau uu.
